Amzruy ngh -1-

[imal]

Amzruy ngh -1-




Mra iga umzruy ghas aylli izrin nttu t, tali ilmd (être facile) fllangh ad t nssuss, nenna: Ajjat agh g mayd izrin, ur agh issihl g uzmz ad, ur ad sis nfsi timukrisin lli yagh isrfufunn ass ad. Mac amzruy ur izri, da ittgga timktit ngh tamattut.



Amzruy illa bdda dingh; illa man akud agh ittall ar ignwan, ig agh addur, iskr gingh tarwa n itran, naf akw middn, illa man akud agh ittgga iskraf lli yagh ur ittajjan ad ng ilallan (libres), igh rad nskr, ngh rad nenna. Inna yan umssan u Tuns, qqarn as Muhmmad Talbi, ifka yan umdya xf watig n umzruy llig inna: Igh rad tssudut atubis ar ak akkan yat tnfult lli immaln is tfrit atig n tsudut, ar ttamzt tanfult ann, ar fllas ttqqnt tidiklt nk, ur as ttnurzumt; acku rad k gis saqqsan, kra n tkkal ar ttggizt zg utubis, tettut ad tluht tanfult ann ak ikrfn afus, mac akud nna d tktit is sul ur tli tnfult ann kra n watig, rad tt tluht tsdrft (libérer) afus nk ig ililli.



Ira ad yini umssan ad: Llant tghawsiwin lli g ar ttamzn middn ggammin ad tnt snfln (changer), acku da tnt ttannayn s yan usmmaqql igrsnn (gelé), akud nna ssnn amzruy nsnt rad tnt fln, skrn mad tnt yufn, gnt aylli d yuckan d uzmz lli g llan. Illa man akud agh ittrzza umzruy ikks agh atig.

G tsga yadn, amzruy ur t igi aylli isarn (se passer) s tidt, acku tidt g ubaraz n umzruy ur tt issn yan, da sawalgh xf tidt izdgn, tidt iga tt aylli xf msasan middn is iga tidt, willi ttaranin amzruy, da t ttaran i wass lli g llan. Tugtt nsn ur ar ttllin s tidt, ar ttllin s tidt lli ran middn ad ttuwnna, ta lli d yuckan d uzmz nsn.



isul …



Agadir ass n 23-01-2008

source: Akunad -Site officiel-

 

[imal]

Re : Amzruy ngh -1-

Amzruy ngh -2-






LLig nsawl xf tatrara (modernité), nenna, nttat hlli ar ad ijjnjm imazighn lli ranin ad gn imazighn g uzmz ad, mac ur d llig ur lin imazighn amzruy, a f rad rwln s dar tatrara. Imazighn lan amzruy ixatrn, mac rrjn (falsifier) asn t wiyyad lli fllasn yuran, acku imazighn nttni ur urin xf ixfawn nsn, mk lli inna usalmad axatar Muhmmad Cafiq. Is d is akk ur urin imazighn xf ixfawn nsn? Ggutn imazighn lli uranin xf umzruy n ayt darsn, mac llig ar ttaran, ar tn ttannayn s walln n wiyyad.



Acku mk lli nenna g ayd izrin middn ur ar ttaran i tidt izdgn, tamdrust g middn ad sis ittllin, mac ar ttaran i uzmz llig llan igh ssnn d igh ur ssnn. Llig ur nbdn (gouverner) imazighn timura nsn s ismawn nsn, ur ufin willi ttaranin amzruy ad asn sawaln xf imazighn lli gan s tidt, ar asn sawaln xf aylli ran, aylli izdghn g ixfawn nsn, d aylli ran ad t gin.



Ar ttuwskarnt tghawsiwin s ifassn n imazighn, ilint trnnawin s idammn n imazighn, g tmura n imazighn, mac, amzruy, isawl s mamk yadn. Tghalt kiy is ur llin imazighn ula tllit g tmura n imazighn.



Yan g inmzruyn ad (ces historiens) ismun middn yan wass iskr asn tamghra, max? Acku yufa yat tghawsa ur jju ighal is rad tt yaf: Ighal yadlli bdda is iga amazigh, aya nn ar t bdda ibrri g ugwns, imil yaf nn, nghd ufan as is iga aзrab, immr bahra, acku igllin ighal is nn idr g tnyaft.



Yan yadn llig idda ayllig issn awal n waзrabn, inna: Tamayt i rebbi inw lli yi d issufghn zg tillas n tgnawt (acku taskla taзrabt da ttgga imazighn d ignawn, llig ur ar ttssn waзrabn ayd ttinin) ar tifawt n taзrabt!



Wid mqqar gan imazighn, ur ufin ad aran amzruy lli rad issutg (valoriser) imazighn.





Isul…



Agadir ass n 07-02-
Akunad -Site officiel-

 

[imal]

Re : Amzruy ngh -1-

Amzruy ngh-3

Igh niwi xf ayd izrin g sin imagradn (articles) lli zwarnin, rad nn naf is d ur ufin imazighn ad ilin amzruy lli disn igaddan igh urta llin. Mad izmrn ad inna ur ta llin imazighn? Ur ad irar xf usqqsi yad ghas yan usqqsi yadn: Mad gant tmatarin lli immaln is nit llan imazighn g tmura nsn?

Immra bahra ad naf kra n tmatart n uzmz ad lli skrn willi nbdnin timura n imazighn wattsn gis ad tmmal tamagit tamazight n tmurt.
- Tutlayt tamazight ur tgi tunsibt (officielle) mqqar d g yat hlli g tmura yad.
- Inhitn (constitutions) n tmura lli yadlli igan tin imazighn, ur gisn yan hlli yaddrn imazighn s tmagit nsn, tugtt nsn da tfssasn xf tmagit n tmurt, mac Libya nttat, tkks akk tamagit tamazight, tg nn tamagit taзrabt.
- Tarwa n imazighn g tmura n imazighn ur ar ttssnn amya xf inmghurn n imazighn, udmawn n tzuri d tussna nsn.

Uggar n mk ann, igh ar sawaln middn ngh xf imazighn, ar sawaln is tn gan wi nn, ur d nkkni; da smmutugn amqqim: Nttni (ils utilisent le prénom: ils) g wansa n: Nkkni. Ur jju ttugh g mzzi nw, g yat tmsirt (une leçon) n umzruy xf Imuhdiyn (les Almohades) d umzwar nsn Muhmmad u tumrt, da ttini tmsirt mk ad: ( Ar as aqqran s usafu=tifawt s wawal nsn). Nnigh d ixf inw akud ann: Is awal nsn ad iga nghd wingh?

Ghalgh akud ann is di nn lligh s tmagit inw izdgn, zigh tinml inw tga yi d imzdi (étranger).Tamagit inw tamazight lli nit sul ddrgh tqqn tt id tinml inw g tniri (dehors). Rad sul ssngh is d akk tamagit ngh mqqar d nttat ad igan agwns, mac tlla d g brra. ur tgi nkki , tga nttat! G tgmmi ns...

Isul…
Agadir ass n 14-02-2008
s: akunad.com

 

[imal]

Re : Amzruy ngh -1-

Amzruy ngh -4-

Irwas is d yugga g ayd lli izrin nenna t is sghawsan imazighn ad ilin yan umzruy ixatrn lli mi rad ilin g umalu ns ard skun tamagit nsn, sghawsan s yan usayrur immuzzan (espace vaste) lli rad yasi tiwargiwin nsn d ibuddutn nsn (leurs vœux), asayrur ad iga t umzruy. Mac mk lli nenna: Amzruy n imazighn rrjn t(falsifier) wiyyad, ssimziyn t g walln nsn, iqqan ad ssnn imazighn amzruy nsn n tidt, ghrn t s izri yadn. Mac ad ur nghal is ilmd (être facile) aya nn. Ira ma yad tawuri iggutn: Ad smmsskln imazighn mk lli s ar ttannayn ixfawn nsn iga kra g tuwuri ad.

« G tghzi n umzruy nsn, imzighn mmaghn bdda xf tghawsiwin n wiyyad ttun tinsn ». Mk ad ad inna yan umara gw Fransa. Is inna tidt? Ur nn yaggug ad tt inna, imdyatn (les exemples) lli fkigh g ayd izrin da zzighzinn ayad lli inna umara yad, mac nkkni ur ad ng inkraf n aylli ittuwskarn g zik, acku ur nssn tifadiwin (circonstances) akkw lli d yiwin aya nn, mac rad nini ass ad: « Ha tarwa n imazighn nkrn d ass ad, ur sul rin ad ghaman usin ghas tighawsiwin n wiyyad! Winna mi tga tayri nsn tilillit (libre) ur yufi umzruy nsn ad tn ikrf, ukan amazigh g wammak ns (son sens) iga t ililli ».

Iqqan ad ssnn tarwa n imazighn mad fkan ayt darsn i tghrma tamadlant, (civilisation mondiale) ur d ad fllasn nskkrkis ar asn nttalgh idgam, is iqqan ad nssanf tikrkas n wiyyad lli yagh yukrn tugtt n tghawsiwin lli ganin tingh gn tnt i ixfawn nsn, aylli mi ur zdarn ad t akwrn, mmaghn ad as kksn atig ngh t snghuban, ajjn agh g zzld. Acku ad issn iwis d illis n umazigh is ila yan umzruy ixatrn, ar as yakka ad yimghur dar ixf ns issn is ila tamagit lli igan tinzgit ad yili ddu umalu ns, ur isghawsa ad ittrwal s dar wiyyad.

Agadir ass n 21-02-2008