Déclaration universelle des droits de l'homme en tachlhite!!

G

Guest

Guest
LEBRîH N DDUNIT S IZERFAN UFGAN


Iffugh d lebrîh n ddunit s izerfan ufgan, aseggwas n kumraw d tam 1948 gh tasut ad llig nella, taswingemt gh tarurt n lebrîh ad s tmazigt tlul gh dar imeslayn n tamesmunt tamaynut n tawsna d isfalkiten umadan gh dujanbir 1989.

Tadumkalt

Llig d tussna s tirrugza izuzdren gh kaygat yan gh imeslayn n tawja n ufgan d izerfan nnes ingaddan, zzegnin, ad yegan tagarat (tarselt) n tderfit, tagdemt, d ufra gh ddunit,

Llig d attu n izerfan ufgan yiwi s isekkirn n traàit lli isigsen afrak n tefgant, ig awttas lli sa ttlin mdden kulluten, ad tlal yat ddunit, llig rad ifejjij kaygat yan s tderfit n inaw, d tagalt, isderfi g tawda d lâz.

Llig d iqqan ad yeg uzerf amarar f izerfan ufgan ad as ur ik bezziz ad inker gh tigira f temurrant d traàit. Llig iga g wammas n tgawsiwin tasdawst n tsimguri n tzdayin fulkinin nger tiwunak.

Llig d imadan n tmttin munnin sawlen dag gh umqqen f liman s izerfan ufgan mqqurnin d tirrugza n kraygat yan, d izerfan ingaddan n irgazen ula timgarin, biksen tuggas ad seftun timguri wamun, allen aswir n tudert gg wallun n tderfit irruten.

Llig d tiwunak timeslayin semqqent f tmawast d tmettin munnin, ad sekrent f timguri n izerfan ufgan d tderfiyin nnes meqqurnin, uqern tent.

Llig d tussna n izerfan ad d tderfiyin ad ad dar tamagart meqqurn ay ttiskar s umqqen ad, hatti:
Agraw yuman n tmettin munnin ar yaqra s lberîh ad n ddunit s izerfan ufgan, mas iga aswir ittidran lliyegan awettas ad t lkmen imadanen d tmettin kulluten, ad yemmag kaygat yan, neg kaygat tarabbut g wamun, lebrîh ad g umnid wallen nnes, ad ssimguren luqqer izerfan ad d tderfiyin ad, s usselmed d tnekra, ttiskarent tazzeliwin mdêfurnin f uswir n tmizar d uswir n ddunit ad sisenssen midden gh ddunit kullut, nger tiwunnak timeslatin s ixef nnsent d imdanen n ikalen lli illan gh ddu tmasayt nnsent.

Imir amezwaru

Ar ttelalen midden kulluten gan iderfiyen, negaddan g tirrugza d izerfan, lan anli d ufrak, illa fellasen ad smsnaran nger-atsen s iman n tagwemat.

Imir wis sin

Iga g izerf n kaygat yan ad ifejjij s izerfan d tderfiyin lli d yuckan gh lebrîh ad, bla kra n usnûhyu, zund asnûhyu s uferdis, neg aklu, neg tazaka, neg tutlayt, neg ddin, neg amnad asertiy, neg kra n umnad yâdnin, neg azûr n tmazirt, neg wi wamun, neg win tmaxirt, neg win tlalit, neg d kra n usures yâdnin, ad ur yili nâhya nger irgazen d tmegarin.
Smed i mad izrin, ur ad yili kra n usnûhyu, ittyasayen f usures asertiy, neg asures n uzerf n tmazirt, neg akal isderfen, neg illa gh ddu tmadîrt, neg tyasas tbendit nnes s kra n usekref.

Imir wis krâd

Ila kraygat yan izerf nnes gh tudert d tderfit d tafrat n ixef nnes.

Imir wis kkûz

Ur tezri tessumga n kra n yan. Tgdel tessumga d tesbbabt n isemgan gh isursen nnsent kulluten.

Imir wis smus

Ur a ittifsar hêtta yan ufgan i usmrret, ula tifgurin, ula ismensnaran icceqqan, neg asdâr n tirrugza.

Imir wis sdîs

Ila kaygat yan gin gh illa ad as ittissan s tixeft nnes n uzerf.

Imir wis sa

Negaddan midden kulluten gh mnid n uzerf, lan kulluten izerf ad fejjijen s yat tmmestant immerwasen, bla asnûhyu, gikli kullu darsen izerf gh yat tmmestant inegaddan mgal asnûhyu lli itteggren i lberîh ad, d usiss f kra n usnûhy zund wad.

Imir wis tam

Ila kaygat yan izerf ad ifettu s tinebâdin (lmâhkamat) n tmazirt, a fellas rarent iskkiren lli ittggern i izerfan nnes meqqurnin lli yas ifka uzerf.

Imir wis tezzâ

Ur izri wammâz n hêtta yan ufgan, gikli ur izri ad t ssemrin neg t zzugen hakkak.

Imir wis mraw

Kaygat yan dars izerf, s tnegaddayt nger as d wiyyâd, ad ttizra tmukrist nnes g yat tinetnbâdt inderfen igêzan, yan izri yugden g tazzalt ad tsengiri g izerfan nnes d imafelaten nnes d tlumas d tnagatin lli fellas ittâren.

Imir wis yan d mraw

1. Ar ittegga wan ilumsen s kra n n tnagt amelsi ar kig yuzer s tazzalt g tintenbâd g lan isugar n tmenàrt fellas.

2. ur ad yuzzer yan s kra n usekkir neg tagayt n usekkir amer ig iga mayan tanagt gh uzerf n tmazirt, neg azerf n ddunit g uzemz llig ittuyskar.
Imir wis sin d mraw Ur ittifsar hêtta yan i ukeccum n hakkak g tudert nnes, neg tawja nnes, neg tuzdegt nnes, neg tibratin nnes, gikli ur ittifsar i tassayin f uddur nnes d tenesflidt nnes.

Imir wis krâd d mraw

1. Kaygat yan dars izerf nnes gh tderfit n umattay d ustay n umras n tuzdegt nnes g ugunes n iwwutta n kaygat tawwunkt.
2. Ila kuyan izerf nnes ad ifel kraygat tamazirt, tekcem gisent hêtta tmazirt nnes, gikli dars izerf nnes ad sis yurri.

Imir wis kkûz d mraw

1. Kaygat yan dars izerf ad yamêz asgelf gh tmizar yâdnin, neg t yurem s trula g userfufen.
2. Ur ar ittefjij s izerf ad yan izrin g tintenbâd s tanagin ur igin tin tsertit, neg iskkiren lli imyagalen d iwettasen n tmettin munnin d isentiyen nnsent.

Imir wis smus d mraw

1. Kaygat yan dars izerf ad ifejjij s yat tawemanit.
2. Ur tezri tuwekkast n tawmanit i hêtta yan s hakkak. gikli ur izri ad ittikkas izerf n usennifel n tawmanit.

Imir wis sdîs d mraw

1. Kud nna ilkem urgaz d temgart tizi n iwel ar darsen ittili izerf ad iwlen, skren tawja, bla kra n isekraf n uferdis, neg tawmanit, neg ddin. Darsen izerfan inegaddan ig rad iwlen d ig rad llefen (rzêmen).
2. Ur ittiskar utgar n iwil (lkagêd llitihal) abla s tayri n imestggaren lli iran ad iwlen sis, bla kra n usbezziz.
3. Tawja aygan taferdist tamagant izwaren gh wamun, dars izerf ad tefjjij s tmestant wwamun ula tawwunkt.

Imir wis sa d mraw

1. Kaygat yan dars izerf nnes ad ittâf wâhdut, neg idra d wiyyâd.
2. Ur tezri tuykkast n uyda i hêtta yan s hakkak.
Imir wis tam d mraw Kaygat yan dars izerf nnes gh tderfit n uswingem, d ufrak, d ddin. Izerf ad yuma tiderfit n usenfel n ddin nnes, neg agal nnes, d tderfit n usiwel fellas, s usselmed d usekkir n tzaliwin nnes g trekwesa, neg tazalt, wâhdut, neg d trabbut nnes.

Imir wis têza d mraw

Kaygat yan dars izerf gh tderfit n umnad (annay) d usiwel. Izerf ad yuma tiderfit ad yasi imnaden nna yera, bla kra n ukeccum, d wayecabba s inegmisen d isewingimen, ihêbbelten, yawi ten, isak ten nger midden s imassen lli yera, s mekna yera, bla isekraf n iwetta.

Imir wis simraw

1. Kaygat yan dars izerf ad isemsli ger temsmunin d trubba n ufra.
2. Ur izri usebzziz n yan ad isemsli gh kra n tmesmunt.

Imir wis simraw d yan

1. Kaygat yan dars izerf ad yawes gh tesmyallayt n tgawsiwin umanin n tmazirt nnes, swa s ixef nnes, swa s ineflas ittistayen s tderfit.
2. Kaygat yan dars izerf lli yellan dar wiyyâd an walan tizayzin umanin g tmazirt nnes.
3. Tayri n umadan ad yegan tagbalut n tmasayt n tnebâdt. Ar ed immal tayri yad s isemstayen zddegnin, kaygat tawalt, ar zrayen s ustay n trekwsa, ngaddan kullu gisen midden, neg kra n tgarast yâdnin tt irwasen, isugren tiderfit n ustay.

Imir wis simraw d sin

Kaygat yan, s tmeslayt nnes gh wamun, dars izerf nnes gh tsugart n wamun, d wad as ttifkan, s tfasa n tmazirt nnes d tin tmawast nger tmizar n ddunit, izerfan nnes n tdamsa, d win wamun, d win tnekra, llid iqqan i tirrugza d timguri iderfen n tixeft nnes.

Imir wis simraw d krâd

1. Kaygat yan dars izerf nnes g twuri. Tili dars tderfit n ustay n twuri s tiwetlin llit isusmen, gikli dars izerf n tmmestant g ucummer.
2. Kaygat yan dars izerf gh tigrad inegaddan n twuri, bla kra n usnûhyu.
3. Kaygat yan, ig isker kra n twuri, dars izerf gh tigerad igdmen, lli rad as isuger netta d tawja nnes, tudert lli d imcuckan d tirrugza n ufgan. Ar as ittismad – ig tid yiwi uzemz- imassen yâdnin n tmmestant wamun.
4. Kaygat yan dars izerf ad isker anemalu, netta d wiyyâd, neg t isekcem, ad ismmesten isâhaten nnes.
Imir wis simraw d kûz Kaygat yan dars izerf gh uswunfu d tizi yugan, yili dars izerf g uswuttu inlan n tiseqqal n twuri d uswunfu ittifran, kaygat tawalt.

Imir wis simraw d smus

1. Kaygat yan dars izerf gh uswir n tudert lli yudan, ad izmer tadawsa nnes d ubuglu nnes netta d tawja nnes, yuma mayan ametcu d isnaraten inebzazen wamun. Yili dars izerf gh tsugart n tudert gh tsursin n ucummer, d tmadûnt, d ugdem, d tudgalt, d twesri, d mad tent irwasen gh tejlayt n imassen n tudert s usrag (azakkak) n tiwetlin d ikkan berra n tayri nnes.
2. Immiten d wazan darsen izerf gh tiwsi d tawit izêlin. Ar tfejjijen wazzan kulluten s tmmestant ingaddan zund ig lulen gh tzedayt n iwil (litihal) zund ig lulen gh berra nnes.

Imir wis simraw d sdîs

1. Kaygat yan dars izerf g usselmed. Ifukk ad yeg usselmed, beàda gh tferkiwin timezwura timegratin, fabur, ifukk ad yeg usselmed amezwaru anebzaz. Ifukk ad yamu usselmed n tzûri d win twuri, irxu f kaygat yan ad ikcem s usselmed ufella s tengaddayt ikmmelen nger as d wiyyâd f tegrat (tarselt) n tzidâr.
2. Ifukk ad teswates tenkra tasimguri n tixeft n ufgan, timguri ikmmelen, d tesdusi n luqqer izerfan ufgan, d tderfiyin nnes timegratin, d tissemguri n umecucku d umesaraf d tiddukla nger imadanen, d trubba n uzûr d ddin kulluten, gikli ifukk ad teswates asmad n tfasa n tmettin munnin f tmmestant n ufra.
3. Id babaten ad dar illa izerf izwaren gh ustay n wanaw n tnekra i tarwa nnsen.

Imir wis simraw d sa

1. Kaygat ixef dars izerf ad idru s tderfit, gh tudert n wamun amwassan, gikli dars izerf ad ifejjij s tzuriyyin (isefalkiten) d tmawast g ufara n tussna, iswasêha g theyyatin nnes.
2. Kaygat ixef dars izerf g tmmestant n isâhaten nnes n tsekla d tedrimt lli d ilulen gh tyaffut nnes n tussna neg tasekla neg tazûri.
Imir wis simraw d tam Kaygat yan dars izerf ad ifejjij s yan ugerra wamun n ddunit llig rad ilin izerfan d tderfiyin llif isawel lebrîh ad, ttiskarent gis.

Imir wis simraw d têzza

1. Kaygat ixef llan fellas imaflaten i wamun lli yas iskaren i tixeft nnes ar ttimgur timguri idrefen ikmmelen.
2. Ur a ittebendaq yan, gh usekkir n izerfan nnes d tderfiyin nnes amer isekraf lli isers uzerf ad isuger tussna s izerfan n wayyâd d tderfiyin nnes, d luqer nnsent, d usekkir n iwennan gdemnin n ugerra yuman, d usâha yuman , d tnekra ifulkin g wamun adimkrat.
3. Ur izri g hêtta yat tsurest ad tiskaren izerfan ad s yan manik imyagalen d iwettasen n tmettin munnin, neg isentiyen nnesent.

Imir wis kra mraw

Ur illa gh lebrîh ad yan imir lli yegan ad ittifsar is ad yakka i kra n tawwunkt, neg kra n trabbut, neg kra n ixef izerf ad isker kra n usekkir lli rad ixlu izerfan d tderfiyin lli d gis yuckan.

Irur t s tmazigt : Hassan Id Balkassm, Brahim Ubella, Ahmed Raghib, Lahocine El Jouhadi, Ussus Mohamed, Bat Omar, El Farkhessi Mohamed, Ben Ihya Lahocine, Ouagrar Mohamed.
 
C'est un travail de fou!
Chapeau aux auteurs!
Y'a rien à dire part qu'on a maintenant le Coran et la declaration universelle des droits de l'Homme en tachelhit.
Il nous manque quoi?
Je vous parie que bientot on aura le code civil en Tachelhit.
Votre pronostic sur les prochaines traductions?
 
Back
Top