Re : Poésie
azul fellawn/kwent ! ayyuz ameqran i trabbut n umarg !
ha yan imik seg "Kalila d Dimna " ( asughl n ali iken)
Imir n yizm d uzger.
Inna y as ugellid Dabcalim i wemusnaw Baydaba ameqran n ibrahmiyn:Awy i-d awal f sin tesman tayri yekk uzwu n tkerkas gerasen allig ur qqimin da ttemseksiwn udmawn. Inna y as Baydaba: Ig llant tkerkas ger sin ittemyirin han tibdti teqqen ten in.Idda -d deg wawal n imezwura nwis ett en ikka g tmurt n Dastawand yan umghar ghur llan kradt icirran.Llig xatren, ka n lehreft ur asen telli g ufus , bdun ar tferziàn iqaridtn n baba tsen bla ad wetin anfa n may ten in iqqnen adday smurn. Ismun ten id baba tsen ilammaten cigan f irefsan nsen ufrighn ,yernu ar yettini: Ay icirran inu àzizen ,han wenna yran ad yili d-ameddakel n tudert ilaq as ad isiggil f kradt tghawsiwin nna wer en ilekkem ghs s kusst n temsal. Kradt timezwura nitenti;tagadit n usadur,tindi (uddur,tizi)ger medden d umattal n y igil(zzad n lixert).d kusset n tghawsiwin yadtn nna s ittawedt, timezwura nitenti;tazedgi n tazzla f iqaridtn ,asmuttr nsen d usebgher nsen aha day d useghres nsen g may zemren ad isheyyu yesfulki tudert d y igil n aytuxxam d w aytmatn, d wenna yezlan yiwt seg temsal a usar yiwidt ayenn yetwarga, acku wenna ur yuzziln ur dars ttilin iqaridtn s ittidir,d mek llan dars aha ur issin mism ten isseghras ad as smurn iqqim gher tmara ad t tezzadt,d mek ten ismutter ur ten issegmi yessebgher ten ad as smurn yan w ass zun tazsult n walln waxxa ur da yetyasay seg digs ghs imik n udegdug maca dteghya da ttesmur,d mek ten isseghres gar aseghres,isirs ten gar aserrus deg gar ansa da t ikkat fad nsen da t issgillin yezzsled t ar ed yaghul ddaw wiyadt. Iqaridtn waxxa tgadayn ggutent tlufa d inidan n tmeddurt ten yessmurn ,nitni zun tanutdfi nna g tensa terga aman mek ur ufin maseg ttekkan da snissitn seg tseggwin kksen tiraf awid-ukan ad ur sduqqsen tanutdfi yekker -d ungay.Yawi-d lhal arraw n umaghar nzsan ayenn asn yenna ,muqqlen digs lxir n imal nsen asin s wawal n bba tsen ..Ikk ett-en yan wass allig ameqran digsen yeggudja gher yat tmurt mi ttinin"Mayun",deg ubrid fella n tkerrust nnes zzughurn sin izgarn ,yiwn ism nnes Catrabatu d waydt ism nnes Bandabatu ,ikka g yat talat n waludt rmin izgarn g unzagh ,ur ed issufgh takerrust ar s-ed-bahra maca izger Catrabatu ihszel en deg w aludt ar ikkat ad t id issufgh netta d kra n inejda allig rmin,idtfar mmis n umaghar abrid yekru yan urgaz ad ihdtu azger ard izwu waludt.maca aàessas ur ikki ghs yan wakud mezziyn ikker idtfur t,llig t in igula ,inna ya s" may tgit, max allig id tedfart bla izger",inna y as netta "azger yemmut acku ityara fellas ad yemmet amcis..d umdan ig as yiwdt w ass hat ula maseg as irwel i tmettant,ayenna yettyaran ayd ittilin"..
amm tin wennagh issnen abrid g da yetteddu is ilghi iga muàur ar issiwid s izmawn aha yeddu digs ,imik yeffegh as-ed seg tezsgi yan w uccn seg w uccan iwàirn ,xs inmala-n ghurs ,s tugda netta iseksew gher tseggwin nnes ur ittizsir xs yan ighrem iwri-n i w asif ,yasi tarewla ,llig en yiwdt arrif n w asif ur yannay is tella negh ur telli ka n tleggit dteghya indtew gher amda ,maca acucf ur as issin ,sghubben t w aman ,ur as igi rebbi lxir xs s kra n medden n ighrem et yannayn rewlen ghers myawasn allig t-id ssufghen sger waccarn n tmettant..llig et -id aghuln idammn iswunfu imik;ur ittizsir digh xs yat tgemmi g y ir n wasif ,inna g iman nns"tigemmi y an ag nnigh ad swunfagh mezyan!" .Ilemmin Ikker iddu gher tgemmi nnagh ,maca ur en ittafa digs xs yat terbiàt n imexxarn illan yumzsen yan umezzenz ar bettdun iqaridtn nnes..ar isalekkat w ul nnes,d bla ad is akwin ittdef tarewla gher ighrem ,yawdt en iddu gher ddaw yan ugadir ad iswunfu seg w anecta n tugda d uwhal.maca ur igi mag isurus ixf nnes gher akal allig irrdel ugadir inegh t .
Inna-s umezzenz :s-tit,yetyana y i w awal a ..Id azger netta yeffgh -ed seg w aludt ideg yella ,yaf dat as ilmutn n tuga d w aman tama n yat tagant yamr ar ittawgh g lehna d talwit ,llig idza yedbuz ibdu ar ismuhrut cigan,imil isella y as yan y izm amqran ;agellid n tagant lli ,yetcarn s y izmawn d w uccan d ikàban d ibaghughn d ighilasn d iksiln, yili yizm ddegh da yettenbadt xs netta ,ur da yettemcawar d awdyan seg winna yas izzin.Llig isella i wesmuhert n uzger ibhetd , netta ur djin yannay akw ka n uzger ,da yetghima ard as d awin wiyadt may ittetca,ur da yetteffegh adghar nns ur da yettedu la sya-la-syin. ayenna y as ed gwemren wiyadt as da yettidir.Yili seg iwaghzenn as izzin i y izm ddegh , sin ikàbunn awmatn yiwn ism nns Kalila d waydt ism nns Dimna. Ilin s- sin nsen id-bab n tiddas d tusna d tsekla. Inna-s Dimna i gmas Kalila: A gma ! May aghn izm ur da yetteffegh seg udghar nns ,ur da yeswuru awyat! ? irar as Kalila :may k isskecmen g tghawsiwin n imeqrann ? nekkni ayenna yagh ittunan neg t,ayenna ira wegellid nra t ayenna ur iri ur t nri,nekwni maci seg ixatarn n tgelda ,ur nelli g tizi nsen af ad nsawal xf tghawsiwin nsen timeqranin .Adj agh-en iwr-in i wawal a ! tisind nwis wenna ur itgafayn adtu ns ar ikeccem g ssuq ur igin wins da y as ittejru uyenna yejran i weqebbab d ubaghus.
Inna-s Dimna: Mism asn tejra digh i wi ? Inna-s Kalila : Ar ttinin nwis yan w ass yan ubaghus izsra aqebbab iqqima xf yan uqbu ar is itnagh s lkunya (tagust) ad t ibdtu xs sin. Abaghus netta yessemdez t uyennagh ,xs ikker uqebbab gher ka n twuri yadtn yagh-en netta ansa nns yiri ad ig amc illa da yettegga uqebbab ,ibdu ikeccem ,-amk ttinin,tarebbatd s ughtir ,ittu tacenyalt nns is tekka ibexsi n uqbu ,xs netta yenzegh tagust ,qerqellamm! iqebbes ghifs ukeccudt alint ingazsn yetwihn ur icfi mag illa ,allig ed yucka uqebbab issiwn as tita ,yagr as ungazs n ta win tmezwarut . Inna-s Dimna : Selligh ayenna tennid,maca isin nwis maci y akw winna yettenmalan gher igellidn da tteddun xf w adisn nsen,maca da-n ttirin ka yessemdazn ameddakl yessidr aàdaw (anedtlab) g gar-tadtfi .Ilin ilemmin medden id-warul,nitni ay da yessemdaz w awdhah,rdtun s uyenna yellan . Id ayt lxir d tàezzsit ur da ten isseànaq uyenna yedrusn ,da -n ttirin tixxitert ten iwatan tas-ed i tizi gen surusn iman nsen.Amm y izm ittetcan tawtul xs da yettannay alghwem da tt ittadja yeddu s alghwm.,is ur da ttizsird mimk da yekkat y iydi s tcenyalt nns ur da yethénna ar da s ittugr ughrum ? d w amm illu (lfil) mi yetwassn lxir nns d tidtni nns ,ur da yetteddu s lemdud nns ar -et yalgh baba nns isslef as àad ay da yettaccm ad ittec..Wenna yeddren d-amawan ig bab- n lxir i y ayt uxxam nns d w awmatn nns hat waxxa y as ittedris leàmer abda ad iqqim idder deg w ulawn n wiyadt .Id wenna yeddren ger tqeccact d twerghiwin n ddunit han awd amettin yuf t ,idder ugar nns. Han wenna yettazzaln xs xf uàeddis nns ur iswi amya amm netta amm lebhimt.
Inna Kalila : nzsigh ayenna tennid maca aghul d ixf nnek tisind nwis akw maggan amdan ila tizi d watig .ayenna g tgid ixf nnek ag ttilid,wenna mi tehwa tizi nns yisin may teswa ur ixdti mc digs iqqima iànq is. d nekwn s-sin tizi nnegh ur nettafa amm taddegh g nella..Inna-s Dimna : Tizza axf tnaghn midden,ur da-n ittili g tinna àlanin xs iàezzsi ughwzsin mi yemmuzgh w ul. bu-w-ul yuf war-ul,amezwaru da yetteddu seg tizi mezzsiyn gher tmeqrant wis-sin seg tizi ymeqqurn gher tmezzsant..D yiley gher tizi tameqrant iceqqa bahra d tiwdti seg digs tewhen bezzaf ,amm wenna yusin iselli ysettuln ,isey nns da yessermi ur id amm tredla nns. Awd nekwni ylaq an-nezdu gher tizza àlanin,ghurnegh mas,nestahel tent ,waxxad amk inna bu-wawal hat tdmeà ay ed da yekkatn bnadm ard ur da -n ittawdt tizi ard digh da yerezzu tan iwri-n as. Inna-s Kalila : Iwa may tannayd dghi ? may ak inna ixf nnek ? Inna-s Dimna : Ad ddugh gher izm ,-netta ka n rray idzan izsman ur t iàlam, ghiygh ad awdtegh ard da s ttawsegh g tenbadt,ad ttenmiligh imik s imik ghers arma tizi nw tmeqqwer deg w alln nns. Inna-s kalila : Max may ak innan ixesszas i yizm wenna y as ittawsen g rray ? Inna-s Dimna : S twengimt inw d uyenna ttizirgh as ssnegh may llan .Argaz ughwzsin da yettisin lhal n umeddakwl nns ,ayenna yetteffer d uyenna yesbayan. Inna-s Kalila : Keyy en iran tizi meqqurn tama n ugellid ilaq ad tisind nwis winna y as izzin nnumn ansa mezyan ,ssnen ayenna ur tessind g twuriwin n ugellid .Maw tessend ayenna da yettiri ugellid d uyenna ur da yettiri ? Inna-s Dimna : Argaz idtnan izsman ur da t itterru w aggwa ysettuln waxxa ur innum isey nns ,d urgaz amguf ur da s ittighiy meqqar ittili d-azerzay. inna-s kalila : Maca han agellid ur da yakka seg lxir nns xs i winna zirs inmalan amedya n ddilit ur da ttaley xs g w addag(aseklu) illan tama nns .Iwa mism ttenmalad gher izm d keyy taggugd ghifs ? Inna-s Dimna : S-tit ! Nzsigh akw may tennid .maca isin nwis maci amm wenna ed yufan ixf nns tama n ugellid amm wenna yewtan ghifs tamara .nek s tidi nw as en ttawdtegh tizi nnadgh acku ssnegh id azerf inw d lhérma nw ayennadgh.S tighrad inw ad awdtegh tizza yattuyn. Ar ttinin nwis ur da ykeccem ar itteffegh xf ugellig xs wenna -n ittadjan zzaxt nnes berra yighiy ad yasi aggwa n tlufa yisin ad itteffer izàafn nns yili yleggwagh d midden ar itteffer ayenna da y as ittunan..Ig en ilkem tizi y a hat yiwdt iswi nns.Inna-s Kalila : Ng-as tiwdted gher agellid,mism tteggad ad ttemghurd deg w alln nns aha ysirs k g tizi -en trid ? Inna-s Dimna :Amr lligh tama nns isingh irefsan nns ad d ids mungh yiwt-yiwt ur is ttemxalafgh ka bezzaf ,ig yukz ka n tghawsa digs nnfeà yiri ad ett ig da y as ett ttalghegh gegh as tiwtatin tiferqacin siwlegh xf nnfeà d lixir digs illan ,d af ad irnu w ul nns g umdaz d tumert da t ssebghasegh a tt-en yawdt.Adday digh ira ad ig ka n tghawsa negh ka n twuri ur izsiln ,nna seg ikszudt ,da y as sawalgh xf texxu n temsalt nnadgh d xf max d mamek allig ur digs ka n lxir. Ssaramgh ad iligh d mmummu-mezri n y izm, righ t ad ittinniy seg ghuri ayenna ur da yettinniy seg wiyadt ,tizi y a ay en righ ghur y izm. argas utmir issnen ad yemmeslay ig ira ad isexxu ayenna yehlan ad t isexxu ig ira ad izzsil ayenna yerkan ad t izzsil , zun anazsur igezzin s tseddi tiwlafin g igudar ,tinna ykecmen tbanent ed ffghent d tinna ed yeffghen tbanent kecment . Inna-s kalila : Iwa hi mk as tennid ay a digh tinid as ay a! hat sulgh kszudgh ak seg tdukli y a d ugellid. Tamunt n igellidn d-asawn! Ar ttinin imusnawn ; kradt temsal ur da tent ittegga xs amxerbeq tamezwarut tamunt d igellidn tis snat tuzzeft n tufriwin i tsednan tis kradt tessi n hidj i wejerreb ( tarmit ).Ar sserwasn imusnawn agellid s yan udrar azentar iceqqa y iley nns ,ar issiwid s y izmawn d ighilasn d w uccan digs illan ,maca yetkar s igumma yadtfutn d tsedday d tawkayin timessanfadin d isufar imenfutn ,d ighimi digs g tlufa nns yugr iley nns. Inna-s Dimna : S-tit ay tennid maca hat ur illi ka bla ka ,wenna ur ittnuyn tiddankiwin ur da yettawdt gher ayenna yra ,wenna yetteggden ur ighiy i tsuraf yettawin s afella,ar ttinin nwis llant kradt temsal ur da y asent ittezdtar xs bu w uddur ixatren,tamezwarut tawuri ghur ugellid,tis snat tanezzut(négoce) deg il ,tis kradt tamewwat d uàdaw (anedtlab),ar ttinin imusnawn nwis argaz utmir ughwzsin ur da yetyannay xs g sin w ansiwn ;ghur ugellid negh ghur igwerramn imhuwac ,amm illu (lfil) ur da yettizsil xs g sin idgharn ; g tagant negh dar igellidn . Inna-s kalila : Rebbi a k iàawn xf uyenna xf-en tgid !
Iwa yeddu Dimna gher izm, ikcem ghifs, issuzel fellas ,izm netta izlem gher yiwn seg winna yas ittin ,inna-s: matta wa ? inna-s : netta flan mmis n flan n ayt flan .Inna-s y izm: da ttisngh baba-s. iseqsa Dimna inna-s : Mag tellid akud a ? Irar-as Dimna : lligh amm kuyass tama n tawwurt n tighremt nnek ,tgannagh mawr i-d tqqard ad ak awsegh g rray acku g tiwwura n igellidn da ttilint cigan n tghawsiwin nna ur da yettisin xs wenna nettighil is ur iswi ka,awd wenna ymezzsiyn ila azal ad en tafd ghurs ibghurn d tanfiwin nna ur illin ghur wiyadt ,ur illi may ur ilin atig awd takeccutd n ubrid wenna t yusin tghiy ad t nfu (nfeà) cigan mgal ka n imihi (danger).
Ibhedt y izm llig isella i w awal n Dimna ,yezlem gher winna- y as ittin inna: Han argas n tussna d w uddur g tizwiri da yettili g tizi tamezzant awd yiwn ur da t ittisin imik s imik ar ittaley w uddur nns amm w afa ku y as tsudted ttalin w alsiwn nns . Llig issen Dimna is as ihwa w awal nns i wegellid inna-s : hat llan medden ed yettackan gher imi n tighremt ugellid mawr asen iqqar ad as siwlen xf tussna nsen tabaghurt .Ar ttinin imezwura nwis lxir iga sin ; wenna yettegga umernay g umerni d wenna yettegga umassan g umassan.
D han tagadit n imyawsen (imàiwnen) ur tfulki ig ur telli ghursen tarmit meqqurn. Han tawuri maci tagadit n ifassn ay tra maca tra ifassn inmen .Amedya n wenna yusin yan uzsru isettuln aha ur as inzi g ssuq.D urgaz isiggiln xf iqejmurn ur da y as tteddu titd gher aghanim waxxa yeggut .Ihi keyy tura ifukk ak ad ur tessemzsiyt awdyan meqqar illa g tizi tamezzant acku ighiy ad y ili w uddur nns ixatr,han amezzan ighiy ad yemghur ,amm uzsar n tmeghrust da y is ittuga lqus (arrac) ar t ttamzsen igellidn g ifassn nsen ar s is tturarn ar s is tnaghn.
D mar ad issken Dimna i winna y as izzin i wegellid nwis aberrek d usuf a n ugellid ur t in ilkim xs s teghrad d w uddur nns maci llig issen zeàma wegellid baba-s,irna ar ittini : Han agellid ur da ysenmili ghurs argaz ula yesseàreq t acku issen baba-s negh ur t issin ,maca da yetmuqqul may ghurs illan d may iswa.Ur illi may inmalan gher amdan xs tafekka nns ,d tfekka kra n tikkal ig temmudtn ur da ttejji xs s usafar as -ed ittekkan berra .llig ikemmel Dimna awal nns ,s umdaz ameqran agellid isserghud s is isghuda y as awal irnu y as tikki, izlem digh y izm gher inseqquma nns inna : Agellid ur as ilaq ad ittu imurn d izerfan n wiyadt , d medden digs sin : Illa umeccenter n irefsan ,netta iga amm tfighra illan g ubrid wenna ur teqqis tikkelt tamezwarut llig fellas isars adtar ad ur ittaghul ad yarm digh tis snat n tikkal acku tghiy ad as teqqes..Yili umelwagh n irefsan netta amm w uzzal asemmadt ig t temrid cigan yaghul ar itteqqed...(isul)
